over the ocean

Wi dir sicher gmerkt heit het mi Blog chli Ferie gmacht. I ha di 2 Mönet in Montañita gnosse zum eifach mau chli sii, natürlech näbscht dr Schueu.
Da sitem letschte Bitrag einegi Wuche si verbi gange gits its o chli öpis z verzeue…
Verblibe simer gloub bi dr Isla de la Plata. Ufem Wäg dert häre heimer Delfine, Wale u turtles gseh. Uf dr Insle säuber hets när verschideni Vögu gha. Die meischt bekannte si gloub d blue footed boobies… Aus i auem ä wunderbare Tag.
Ja ner ir nächschte Wuche hani mi widr mit surfe versuecht und ha de o es paar Fortschritte gmacht. Leidr bini abr de nachem dritte Tag vore stingray gstoche worde und ha mini erschti Erfahrig im Spitau vo Manglaralto gmacht. D Behandlig isch gratis gsi und si heis auso me odr weniger professionell gmacht, natürlech si d Hygienestandards nid vergliichbar mit denä ir Schwiz. Uf jedefau bini de scho gli widr besser zwäg gsi und ha mi am Friti widr ufs Brätt trout… Das hetsech abr aus Fehler usegsteut, wärs gloubt odr nid, i ha e zwöite Stich übercho und bi de scho chli glassener und eifach nur gnärvt gsi wöui das ganze Prozedere ja scho kennt ha. Aus chlini Näbeinfo, dr Stich isch relativ schmärzhaft, s faht afa blüete und ner brönnts wie Wahnsinnig! Jaaa und da i ner widr ha Injektione übercho und wahrschindlech no chli agschlage vom letschte mau bi gsi hetsmi de is Bett ghoue mit Fieber und di ganzi nächschti Wuche bini völlig schlapp gsi.
Das wär so chli mis erschte negative Erläbnis gsi i mire Reiseziit bi its.
Abr vergässe mir das gschidr widr, i hami de speter widr ufs Brätt trout und ha jedi Lektion ohni Zwüschfau gnosse. Mini Täg hani mit Schueu, Schlafe, Sünnele, Choche, Volley odr eifach chli ir Hängematte verbracht.
Its chömemer no zum Höhepunkt vo mim Ufenthaut in Ecuador! 😀 😀 😀
I ha mit äre Kollegin vor Schueu ä Abstächer zu de Galapagos gmacht! Das isch eis vo de beschte Erläbnis ever! Die Landschafte, Tier und z Wätter si Wahnsinnig gsi! Mir hei im Vorus nur dr Flug buecht und hei ner aus vo de Insle us gmacht. Jede Trip lohnenswärt, jede Strand es Erläbnis. S isch paradiisisch dert! 😀

I bi für ei Wuche dert gsi u ner widr zrügg nach Montañita für di letschti Wuche in Ecuador. Das heisst no einisch vougas Fiesta und verabschide vo au de Bekanntschafte. S isch e tolli Ziit gsi!
Jaa u mittlerwile bini scho in Cusco und ha mi erscht Schueutag hinger mir. Ds Klima hie isch völlig angers, i bi vo 0 uf 3’300 M.ü.M. greist, d Luft isch viu trochener und s isch iischchaut ir Nacht. Abr i wohne its mitts imne valley und bimne eutere Ehepaar wo meeega fründlech isch. I wirde definitiv mis Spanisch chönne verbesserä i derä Ziit hie.
U de würdi säge bis zum nächschte mau, i hoffe dases dasmau nid sooo lang geit 😉