Home sweet home

So sit es paar Täg bini widr dehei ungerwägs. Die letschte Täg in Cusco hani no gnosse mit dr Familie dert und mit de Kollege u de bini ab i Flüger. Nach 2x umstige bini de in Züri acho und vo mine Eutere und ere Kollegin abghout worde. Mir si mitem Zug richtig Hei gfahre und dert hei no einisch Fründe uf mi gwartet und sogar mi Gottibueb het mi usem Outo use agstrahlet 🙂
I ha de dehei ändlech widr mau richtig heissi Duschi mit viu Wasser chönne gniesse und ner e erhousami Nacht im eigete Bett gha.
I ha viu Fründe troffe u mi widr guet igläbt dehei. Mängisch chunnts mir vor aus wär die Reis scho ewig lang här. Ohni mis Wüsse bini de am Samschti no are Überraschigs-Wiukommens-Party glandet. Es isch so es schöns Gfüeu z wüsse, dass es Lüüt git wo dehei uf eim warte und sich uf eim fröie. So chunntme uf jedefau gärn hei. 🙂
Zu mim Glück chani nächscht Mänti oscho widr afa schaffe, i cha widr bim Tröihandbüro woni vorhär bi gsi afa.
Its no öpis für aui wo gärn no chli me Biuder wette gseh und vilech ono angeri Gschichte ghöre. Am nächschte Samschti tueni chli verzeue vo mire Reis. Das Ganze findet im Begegnungszentrum Wellenried 8, 3150 Schwarzeburg statt. Mir starte am 20.00 u i fröie mi natürlech e huufe Gsichter z gseh, obwous e chli churzfrischtig isch.
Wahschindlech wirdi ab its o nümm grad so viu im Blog schribe, da i ja o nümm over the ocean bi. 😉
Merci viu mau a aui wo mini Erläbnis mitverfougt hei, es isch kuul gsi öich z verzeue vo mire Reis.

Los últimos días…

Di zwöi letschte Städt woni in Chile bsuecht ha si nümm ganz so spektakulär gsi wie di vorhärige Orte. I ha dr Strand gnosse u a mire brüüni gschaffet, was sich bi mir natürlech wie immer eher schwirig gstautet 😉
I bi de ner am Samschti widr nach Peru igreist u hami dert in Arequipa iquartiert. Me seit es sig die wissi Stadt wöu viu Geböide us wissem Vulkanstei bestöh. I bi de per Zuefau anes kulinarischs Festival häreglofe u ha dert no einisch chönne es paar Köstlechkeite us Peru beguetachte u schmöcke u es feins lokaus Bierli trinke.
Am nächschte Tag bini ner mitere Tour i Cañon de Colca gfahre womer hei Kondore atroffe. Di si extrem idrücklech gsi. Ds isch wahnsinnig we sone bis 3m breite Kondor über eim über flügt! U es gstautet sich seeeehr schwirig es enigermasse akzeptabus Föteli z mache da si ja nid äxtra blibe stah obedran 😉
Ja speter simer de no imne Dörfli verbi cho wome mitemne Adler het chönne pose.

image

I erwähne its nume näbebi das dä nätt Kärli e Sekunde speter het z Gfüeu gha är müesi sis Gschäft uf mire Schultere verrichte 🙂 abr ja, hie in Südamerika säge si dases Glück bringt we so öpis passiert 😀
Mit Vorfröid ufe nächscht Tag bini de früe ga pfuuse.
Am nächschte Morge hani nämlech widr mini Kollegin us Holland troffe woni vo Montañita kenne und wo mit mir ufem Machu Picchu isch gsi. Mir hei e wunderbare Tag zäme verbracht. Hei widr einisch e Pisco Sour bsteut u si ufne free walking tour dür Arequipa gange u hei ner no zäme Znacht gässe. Weme so lang ungerwägs isch u so viu nöii Lüüt lehrt kenne ischs fantastisch mau widr es Gsicht z gseh wome scho kennt und wome nid di ganzi Gschicht vo vore a mues verzeue.
I ha de när mini letschti Busfahrt aträtte und bi am nächschte Morge in Cusco acho. Dert wohni widr bir Familie woni scho vorhär bi gsi, si heimi scho fröidig erwartet 😀
Ja u its hüt bini ir Schueu gane Bsuech mache mir hei nomau Brownies bache, Kollegin wo immerno in Cusco isch isch o widr mitcho, und si hei üs de grad iglade für morn ga Zmittag z ässe wöusi zäme wei choche. Da sägi natürlech nid nei… 😉
U morn gani no einisch zum Heim zrügg woni gschaffet ha u de choufi no di letschte Souvenirs u ner gits no una grande fiesta für mi letscht Abe uf mire grosse Reis.
Am Samschti geits de ab i Flüger u we nüt schief louft chani am Sunnti scho widr i mim eigete Bett schlafe!! 😉 😀
Wahnsinn das die 8 Mönet its scho düre si…
Z nächschte Mau mäudi mi de widr us dr Schwiz. 👍

Zrügg in Chile

So i hät eiglech sit paar Täg e Itrag parat gha zum ufschaute, abr da di liebi Technologie nid mitgspiut het bini chli hingerdrii und cha oscho widr me verzeue.
In Córdoba hets leider de kes BBQ gä, drfür hani gratis anes Konzärt im Stadtteather chönne ga. Es isch äbe scho öpis angers weme mit Turischte amne Ort isch odr mit Iheimische. Da gsehtme u lehrt ganz angeri Sache.
Uf jedefau bini bis am Sunnti vorere Wuche dert gsi u ner witer nach Mendoza. Woni bi acho hani eigentlech grad wöue d Wiiterreis nach Valparaíso in Chile bueche. De heisimer aber gseit das sig nid müglech wöu d Gränze gschlosse isch. Chli schockiert bini de zum Hostel und ha ersch speter am Abe erfahre das dr Pass nach Chile wäge Schneefau gschlosse isch u dasme am Zischti cha witerreise. I bi aber de bis am Donnschti blibe da i no e Tagesuflug mit Pferderitt und BBQ (nach langem Warte ändlech es richtigs BBQ) gmacht ha und ono e Tour dürd Stadt. Ja u schlussändlech ischs de witer mitem Bus u woni ha gseh was si mit Schnee meine hani chli müesse Schmunzle… Aus Schwizer ischme sich definitiv angers u me Schnee gwöhnt wes heisst d Strass isch gsperrt 😉
Uf jedefau heisi dert ide Ande e huufe Skiresorts aber di si aui gschlosse gsi da si ja its Früehlig hei und äbe eiglech o nimm so viu Schnee.
Schlussändlech de in Chile bini wägeme Missverständnis vo mir und em Busfahrer in Viña de mar anstatt in Valparaíso glandet. I hami aber de entschide dert z blibe das es gmüetlechs Stedtli isch gsi und Valparaíso chame guet i eim Tag aluege. Das hani de am Friti gmacht u bi ufne 3-stündegi Walkingtour mit Guide gange. Mir hei viu verschideni Graffitis gseh, was eis vo de Merkmau vo derä Stadt isch.
wpid-wp-1445899828813.jpg
Das isch eis vo mine Lieblingsbiuder. Jedes, odr ömu fasch jedes vo de Graffiti het irgend e Bedütig und isch meischtens o gnämigt vom Husbsitzer odr vor Gmeindsverwautig.
Da i mi relativ guet mitem Guide verstange ha, was vilech dran gläge het dasi dr einzig Teilnähmer i sim Auter bi gsi, het är mi de zu sim Geburifescht am nächschte Tag iglade.
O im Hostel woni bi gsi hets mega kuuli Lüüt gha, de heimer zum Bispiu e Pizzaabe gha u hei inklusive Teig aus säuber gmacht oder einisch simer ufem Baukon zämeghoket u einä het Gitarregspiut u gsunge. S isch auso würklech e kuuli Zyt gsi.
Und so näbebi, i bi ändlech widr ar Küste gsi!! 😀
Ja u its hocki vilech zu öire Überraschig widr einisch im Bus u ha Zyt zum schribe. 24h geits bisi im Norde vo Chile, in Iquique bi, natürlech o widr ar Küste. 😉
Und weni mi nid tüüsche isch das gloub di letschti so längi Busfahrt da mini Reis scho gli am Ändi zue geit. I nidmau me 2 Wuche bini scho widr dehei azträffe. So es Bitzli fröii mi auso scho 🙂

The beauty of nature

Witer geit mini Reis in Salta. Nach langem umhärirre ir Stadt hani de es Hostel gfunge fürne Nacht und hami dert iquartiert. Da i z Ticket nach Puerto Iguazú scho füre nächscht Tag buechet ha ischmer nid so vou Zyt blibe zum d Stadt ga aluege. Z einzige woni de gmacht ha isch mitemne schwizer Gondeli zur Ussichtsplattform fahre. Dert hani e wunderbari Sicht über Salta gha und hami scho chli heimelig gfüeut mit dr schwizer Gondubahn näbedran.
De ischs de witer gange mitere 24h Busfahrt wo de schlussändlech 27h si drus worde wöu d Tür isch kaputt gange umer düre es paar Polizeikontroue hei müesse. I ha de dert aber e Holländerin troffe im Bus und mir heinis zämegschlosse für am nächschte Abe ga es Hostel z sueche u si am när o zäme ga di viuversprächende Wasserfäu aluege.
Leider heimer am Sunnti chli Päch gha mitem Wätter wöu wemer nid si nass worde vom Wasserfau de het üs dr Räge dürnässt. Trotzdäm heimer das Naturschouschpiu gnosse. Die Wassermängine wo dert z Loch ab tose!! Das isch wahnsinn… Mir si dr ganz Park abglofe und hei die unzählige Wasserfäu vo verschidene Perspektive bestuunt. Und trotz em Räge hets es paar kuuli Biuder gä.

image

A däm Abe simer när no i Usgang u hei de am nächschte Tag e gmüetleche relaxing-day gha.
Am Zischti ischs für mi witer gange nach Córdoba, e witeri 22h Busfahrt (und welch Überraaschung, mir hei o dert Verspätig gha wäg de vile Polizeikontroue ungerwägs), das heisst i bi am Mittwuch morge acho und am terminal vor Kollegin abghout worde.
Si het mi iglade bi sich und irere Mueter z wohne u ja sit denn bini dert iquartiert. Mir si zäme ga Museum aluege, hei iri Verwandte u Fründe bsuecht u weni Schwein ha de chani vilech sogar no mit anes typisch argentinischs BBQ. Es isch aber no nid sicher öbs klappet, aber wenn ja, ghöret dir scho gli drvo. Dr Plan isch bis am Samschti/Sunnti no da z blibe u ner geits witer nach Mendoza (70% vom argentinische Wy wird i derä Region produziert ;-))

Vo Bolivia nach Argentina

10h Busfahrt, das heisst i ha gäbig Zyt zum schribe 🙂
I de letschte paar Täg hani viu erläbt und zimlechi Distanze zrüggleit. Agfange het ds Ganze in La Paz woni es paar Täg verbracht ha zum d Stadt aluege. I ha de dert e Amerikaner troffe womer super Tips het chönne gä für mini witeri Reiseroute, mir si zäme imne Hostel gsi und di erschti Nacht hetermer bis am Morge früe vo sine Erläbnis u sim Läbe verzeut, er isch sit me aus 5 Jahr in Südamerika am Reise. Leider hani abr de i derä Stadt o irgend ä Chäfer ufgläse u bi es paar Täg nid so zwäg gsi. Schlussändlech bini abr de gliich witergreist nacht Potosí, eini vo de höchschtglägenschte Grossstädt vor Wäut uf 4’000 M.ü.M. Dert häti fasch dr ganz Tag verschlafe, wöui äbe nid zwäg bi gsi, wemi de nid e Bolivianer wo im gliiche Zimmer isch gsi gfragt hät öbi eiglech dr Umzug nid wöug ga luege. Si hei es riise Fescht gha ir Stadt u i bi de när mit ihm u sine Kollege chli ga zueluege. Z Klima dert isch auso ono interessant gsi. Am Morge hets gschneit u am Namitag isch ner widr um di 20Grad und sunnig gsi.
Am nächschte Tag bini witr nach Uyuni u vo dert hani e 3-Tages trip nach San Pedro de Atacama, Chile gmacht. Das heisst mir si am erschte Tag d Sauzwüschti vo Uyuni ga aluege was sehr idrücklech isch gsi, am zweite Tag ner diversi Lagunas u Geysirs. Am zweite Abe simer de imne Hostel gsi wosi Warmwasserquelle gha hei und de simer üs nachem Znacht ga entspanne. I gloub i ha vorhär no nie sone schöne Stärnehimu gseh. Mitts ire höchglägene Wüeschti, wiit u breit kei Liecht und unzählegi Stärnschnuppe 😀

image

Am letschte Tag simer de nomau gane Lagune aluege u ner ab über d Gränze. Da i dert scho am Mittag bi acho hetsmer de ono glängt ga ds Valle de la luna aluege. Das isch ir Wüeschti Atacama u het usgseh aus hät öper Puderzucker über d Hügu gschtröit. Ah und bye the way, ändlech widr Churzhosewätter 😉
Ja u its bini äbe widr ungerwägs u oscho widr imne angere Land. Ha Kontakte knüpft im Bus für Übernachtigsmüglechkeite in Argentinie u bi di faszinierendi Landschaft am bestuune.
Nächschte Stop – Salta, Argentina.

Al principio de mi viaje

So mini Liebe, i hocke da im Bus nach La Paz u ha dänkt i tuemer Zyt vertribe mitemne chline Bitrag. Gstartet hani am Samschti mitere 7h Busfahrt nach Puno. Dert hani de am Sunntimorge e Tour zu de Islas Flotantes und zur Insle Taquile gmacht. Puno säuber isch nid sooo schön, abr dr Lago Titicaca isch e ächti Sensation! I hamer de schön mis Näsi verbrönnt da i natürlech nid dra dänkt ha dasi trotz er Cheuti söt Sunnecreme bruuche. Da dr See uf ca. 3’800 M.ü.M. ligt wirds o düre Tag nid brönnend heiss und i bi froh gsi um mini Chappe.
Am nächschte Morge bini de witer mitem Bus überd Gränze nach Cobacabana, Bolivie. Und dert hani no einisch meh gstuunet ab dr Schönheit vo däm fantastische See!

image

I ha de am Mänti e chline Hike gmacht zum d Ussicht gniesse und hüt hani e Usflug zur Isla del Sol. Ja u its hocki da im Bus und bi vorhär fasch chli erschrocke woni mi plötzlech mitsamt em Bus ufere Fähre ha befunde.
U its hoffi dasi de heil in La Paz achume woni öpe es paar Tag wirde verbringe bisi weiss wie gnau mini Reis witergeit.
Bis gli!

Zyt vergeit wi im Flug…

Its bini auso scho ir letschte Wuche vom Volontariat acho. Me gwöhnt sich relativ schnäu ad Arbeit und mittlerwile heimer o chli me Zyt üs um d Ching z kümmere wöu mir d Arbeit kenne u schnäuer schaffe. Das heisst mir chöi mitne use ga loufe, mau versueche es paar Sprachüebige z mache u se zum Lache bringe.
Es bruucht nid viu das si merke dases öper guet mitne meint. Und wesi de vö afa lache und säuber ufne ganz eifachi Art Witzli mache u me sich mit ihne fröit isch ds aus wos bruucht. Me cha afa e Verbindig ufboue und scho am Morge weme zur Tür inechunnt strahle si übers ganze Gsicht. Wahnsinn! <_3 Näbscht dr arbeit hani letscht wuche no dörfe geburi fiire. 😀 I hamer de gwünscht dasmer zum Zmittag gö ga cuy ässe, dame das ja scho mau mues probiere weme in Peru isch. So het de mis Täuer usgseh:

image

Es isch its auso nid grad zu mire Lieblingsspiis worde u i wirdes höchschtwahrschindlech o nieme irgendwo bsteue.. Nid das z Fleisch nid guet wär, s isch fasch wi Poulet aber d Art wis präsentiert wird und ner wimes vo Hang vertromet… Naja :-S
Uf jedefau hani das Erläbnis its o hinger mir und es het de zum Glück no es Stück Schwarzwäudlertorte gä zum Dessert.
Am Abe bini de no i Usgang und ha mit de Fründe vor Schueu chli gfiiret. 🙂
Aus i Auem, ganz ä gäbige Geburi.
Mini Zyt in Cusco isch ja its de oscho baud düre und i ha its fang z Busbillett nach Puno kouft dasi de am Samschti cha zum Lake Titicaca fahre u de startet de di letschti Etappe vo mire Reis. 😀

Start im Volontariat

Nachere eher ruhige Wuche nachem Usflug zum Machu Picchu hani die Wuche mitem Volontariat agfange.
Vilech no zum einzig Spektakuläre wo gsi isch bevori vor Arbeit verzeue…
I bi nomau im choco museo gsi und ha dert ä Workshop bsuecht. Mir hei verschideni traditionelli Getränk mit Schoggi gmacht und hei de o üsi eigeti Schoggi chönne kreiere…
Natürlech hani o d Schwiz guet verträte bir competition wos drum isch gange wär die fiinschti Schoggipaste härebringt. Aus Gwinn hani de es Päckli choco beans Schale übercho zum Schoggitee mache, was öpis ganz köstlechs isch.
Ja its hani äbe die 2 erschte Täg im „Hogar Madre Teresa“ hinger mir. Es isch e Astaut wo vo Nonne gfüehrt wird und si betröie behinderti und verstosseni Erwachsni und Ching. Mini Arbeit bis its isch gsi dasi ha Böde gwüscht und ufgno, de Ching Ässe gä, ir Chuchi ghoufe und was mi am meischte erstuunt het, Wösch vo Hang gwäsche…
Si wäsche tagtäglech aui Chleider und Wösch vo de Ching ohni Wöschmaschine.  Weme vergliicht wie bi üs ir Schwiz sone Ort würd funktioniere und was für Infrastrukture mir hei und ner das Heim hie in Cusco gseht verrissts eim fasch z Härz.
Au di Ching hocke im Rollstuel u chöisech chum säuber bewege. Redä cha keis und zum Teu sisi blind oder ghörlos.
Es isch truurig z gseh wie das ganze hie louft und die drü Wuche woni da wirde schaffe wärde bestimmt sehr usefordernd. Gliich bini froh dasi o die Site vo Peru cha gseh und nid nur die schöne turistische sitios.
I wirdenech sicher gli widr me verzeue.

Machu Picchu

Adventure pur, das isch z einzige wo die Reis korräkt beschribt 😉
Gstartet hani letscht Donnschti am Morge mitere Busfahrt bis uf ca. 4000 M.ü.M. vo wo us mir ner mit de bikes 45km z Loch abdüüset si. Das isch scho mau e super Start gsi. Ner ischs witergange mit River-Rafting, was de e schöni und ungwollti Abchüelig isch gsi 😛
S het abr mega gfägt und mir si es guets Team gsi wo o bi de Rettigsmassnahme aus gä het…
Am nächschte Morge hei mir üs früe ufe Wäg gmacht dasmer di 21km z Fuess müglescht gli hinger üs hei. S isch zimli Bärgufgange und het o paar heikli Passage drbi gha wi zum Bispiu schmali Brüggli mit fählende Ladli odr sehr schmali Wägli mit Abgrund uf eire Site u Bärgwand uf dr andere. Mit Höheangscht hetme dert auso chli Müeh gha, was zum Glück bi mir nid dr Fau isch gsi.
Nach ca. 8h simer de zu de sogenannte Hot Springs cho womer üs de im warme Wasser hei chönne entspanne. Speter simer de no ga Tanze und hei dr Abe zäme aus Gruppe gnosse.
Am nächschte Morge heimer Zip-Lining gmacht. U ds het auso o bi mr chli Überwindig bruucht. Mir hei e Schlucht mehrmaus i schwindelerregender Höhi überquert. Nach dr erschte Abfahrt, odr wie o immer mä däm wot säge hani abr Spass a däm ganze übercho hehe 😀
Ja nach dem heimer de nomau e paar Stund Wanderig vor üs gha und si am Abe früe ga schlafe.
Am Sunnti isch de der letscht Tag vor Reis scho früe losgange mit Träffpunkt am 4.30h u de heimer mitem Ufstig (2’500 Stägetritte) zum Machu Picchu agfange. Mir si de genau bi Sunneufgang bi de Ruine acho u hei nume chönne stuune. Z Wätter hätt nid besser chönne si. Keni Wulke u herrlech warm ischs gsi.
Ds Stägeloufe het sich uf jedefau glohnt 😀

image

Reunion

Nach mire zwöite Wuche un Cusco gits scho widr einiges z Verzeue… Wi gseit hani letscht Mänti mit Privatunterricht gstartet und bi anschinend scho so guet dasi cha ids advanced Level wächsle morn. 😉
Ner hani e huuufe acitivities gha… Gstartet hani mit Musigunterricht womer Panflöte gspiut hei. Ner bini ids Schoggimuseum gange, was üsserscht interessant und lecker isch gsi 😀 und i ga de nomau häre zum ä Workshop bsueche woni minu eigeti Schoggi cha mache.
Am Mittwuch bini de z erschte mau ufne Hike zu verschidene Ruine wie Quenqo u Templo de la luna und uf derä Höchi isch ds auso no asträngend…
Jaaa am Donnschti bini mi ner mau ga erkunde bi verschidene agencies füre Inka Jungle Trail, aschliessend hani e Füehrig dürds Zentrum gha und de am Abe no Salsaunterricht. Isch e super Tag gsi!!
Am Friti heimer ir Schueu anstatt conversation class cooking class gha und de hets sit langem widr mau Pasta und zum Dessert Brownies gä. 😀
Am Namittag hani mi de mau chli usgruit für dasi ha chönne Energie tanke fürd Wanderig vom Samschti.
Mir si de am Morge am 8ti los gfahre mitem Taxi und hei am 9.30 mit Loufe agfange. Dr Ufstig isch auso no happig gsi, wöu dr höchscht Punkt isch uf 4’400 M.ü.M. gsi. Bim Abstig simer no a Ruine verbi cho u hei dert e Mittagspouse gmacht.

image

Aus i auem simer de 5h am Wandere gsi u d Chnöi gspüri auso gengo vom Abstieg. Zum Z’nacht heimer üs de e feini Pizza gönnt.
Its vilech no zum Titu… Mir het e Kollegin gschribe woni in Ecuador ha troffe das si nach Cusco chunnt und si isch äbe de am Samschti acho und isch de mit üs i Usgang cho.
Und jaaa its no z Beschte zum Schluss… Hüt hani äbe mit derä Kollegin, si isch übrigens us Holland, dr Inka Jungle Trail zum Machu Picchu buecht. Das heisst, nächscht Donnschti geits ab ufne 4-tägegi Tour zu de berüehmte Inka Ruine. 😀 😀 😀
I fröie mi scho öich de vo däm Erläbnis z verzeue!!

« Previous entries